O Concello de Oroso volveu celebrar unha das citas máis entrañables do seu calendario social coa Festa dos Maiores, unha xornada que reuniu nesta edición a preto de 850 veciños e veciñas nun ambiente marcado pola convivencia, a alegría e o recoñecemento.

O encontro converteuse nun espazo de celebración e agradecemento ás persoas maiores do municipio, protagonistas dunha vida de esforzo, traballo e compromiso coa comunidade. A xornada estivo chea de momentos emotivos, música e actividades pensadas para a ledicia de todos os asistentes, favorecendo tamén o reencontro entre amizades e xeracións.

Durante o evento, púxose en valor o papel fundamental das persoas maiores na construción do Oroso actual, destacando a súa experiencia, sabedoría e contribución ao desenvolvemento social e cultural do municipio. Este tipo de iniciativas forman parte do compromiso do Concello por promover o envellecemento activo e combater a soidade non desexada, creando espazos de participación e relación social.

A Festa dos Maiores consolidase así como unha das celebracións máis agardadas do ano, converténdose nun punto de encontro imprescindible para a veciñanza e nun símbolo do respecto e cariño que Oroso amosa ás súas persoas maiores.

Desde o Concello queremos agradecer a participación de todas as persoas asistentes, así como o traballo de todas aquelas que colaboraron na organización desta xornada, facendo posible o éxito dunha celebración que segue medrando ano tras ano.

Porque en Oroso, os nosos maiores non só son parte da nosa historia, senón tamén un piar fundamental do noso presente e do noso futuro.