O Concello de Oroso informa do inicio das obras de renovación integral no local social destinado ás persoas maiores, situado na Rúa do Campo, unha actuación moi esperada que ten como obxectivo modernizar este espazo de encontro e lecer, fundamental para o benestar da nosa veciñanza máis veterana.

Un espazo renovado para desfrutar e compartir

A intervención abrangue múltiples melloras tanto a nivel estético como funcional. En primeiro lugar, comezamos cunha renovación completa do mobiliario e dos equipamentos: novos sofás, cadeiras, butacas confortables, modernas estanterías, e instalación de novas televisións de alta definición.

Estes cambios permitirán crear un ambiente máis acolledor, accesible e adaptado ás necesidades das persoas usuarias.

Melloras en confort e eficiencia As obras tamén inclúen a substitución do sistema de iluminación, con tecnoloxía LED máis eficiente a instalación dun novo sistema de climatización, que garantirá unha temperatura óptima durante todo o ano a colocación dunha nova tarima flotante, máis cálida e segura o pintado interior de todo o local, renovando a estética do espazo.

Estas actuacións contribuirán a facer do local un lugar máis agradable, eficiente e funcional, onde as persoas maiores poidan reunirse con comodidade, participar en actividades, ou simplemente pasar un bo rato.

Un proxecto conxunto pola calidade de vida

Este proxecto lévase a cabo en colaboración co Consorcio Galego de Servizos de Igualdade e Benestar da Xunta de Galicia, reforzando así o compromiso compartido de mellorar a calidade de vida das persoas maiores e seguir avanzando cara a un modelo de atención máis próximo, digno e humano.

“Cuidar dos nosos maiores é unha prioridade para este goberno. Merecen espazos dignos, cómodos e pensados para favorecer o seu benestar e participación”, sinalou o Alcalde de Oroso, Álex Doval.

Desde o Concello, seguiremos traballando para que Oroso sexa un lugar para vivir todas as etapas da vida con dignidade, comodidade e benestar.