O primeiro orzamento elaborado polo goberno liderado por Alex Doval e o Partido Popular supuxo unha destacada mellora en comparación co exercicio 2023, marcando un punto de inflexión na xestión económica municipal.

Segundo o informe de Tesourería, a liquidación orzamentaria do exercicio 2024 reflicte un resultado positivo grazas a unha xestión eficaz dos recursos públicos e a un esforzo significativo para cumprir coas regras fiscais establecidas na Lei Orgánica 2/2012.

Entre os principais logros destacan:

1. Cumprimento do obxectivo de estabilidade orzamentaria e da regra de gasto:

A diferenza do que sucedeu en 2022 e 2023, o exercicio 2024 logrou axustarse plenamente á normativa fiscal, reflectindo un importante compromiso coa sustentabilidade económica.

2. Contención do gasto corrente:

Observouse unha diminución de 4,61 puntos porcentuais no crecemento do gasto corrente en comparación co ano anterior, demostrando unha xestión responsable dos recursos municipais.

3. Incremento na execución de investimentos:

A execución en materia de investimentos experimentou un aumento de 10,88 puntos porcentuais respecto a 2023, froito dun esforzo importante para licitar proxectos pendentes e impulsar o desenvolvemento local.

4. Mellora na execución de ingresos:

Os ingresos municipais aumentaron un 8,78% en termos porcentuais, o que se traduce nun incremento de 767.772,44 euros respecto ao exercicio anterior. Este crecemento reflicte unha maior eficacia na xestión tributaria e unha aposta por fortalecer as arcas públicas sen comprometer os cidadáns.

5. Regularización de servizos:

Durante 2024 avanzouse significativamente na contratación de estudos económicos e de viabilidade para mellorar servizos esenciais como o abastecemento de auga, o saneamento e a recollida de residuos.

Alex Doval destacou que “estes datos avalan a nosa xestión como un goberno responsable, que prioriza a eficiencia económica e a mellora dos servizos públicos para todos os veciños de Oroso. Este é só o comezo dunha etapa marcada pola estabilidade e o progreso”.

A boa saúde das contas municipais posiciona a Oroso como un exemplo de gobernanza responsable e comprometida co futuro, sentando as bases para novos proxectos que beneficiaran á cidadanía nos vindeiros anos.