Oroso abre ata o 1 de febreiro de 2027 o prazo para presentar suxestións á modificación do PXOM

Presentación de suxestións no marco do proceso de modificación do Plan Xeral de Ordenación Municipal (PXOM)

O Concello habilita un período de tres meses para que as persoas propietarias de terreos e parcelas trasladen as súas propostas e necesidades urbanísticas.
O alcalde, Álex Doval, anima a participar neste proceso para coñecer a realidade do territorio e planificar o futuro do municipio.

O Concello de Oroso abriu o prazo para a presentación de suxestións no marco do proceso de modificación do Plan Xeral de Ordenación Municipal (PXOM), unha iniciativa que permitirá ás persoas propietarias de terreos e parcelas trasladar as súas propostas e necesidades en materia urbanística, co obxectivo de que poidan ser estudadas durante os traballos de revisión do planeamento municipal.

O período de presentación comezou o 1 de novembro de 2026 e permanecerá aberto ata o 1 de febreiro de 2027, polo que as persoas interesadas dispoñen de tres meses para achegar a información relativa ás súas parcelas e formular as propostas que consideren oportunas.

Esta fase permitirá recompilar información sobre a situación actual dos terreos e as necesidades das persoas propietarias, co fin de facilitar a análise técnica das distintas realidades existentes no municipio.

Como presentar as suxestións?

As persoas propietarias interesadas deberán cubrir o formulario habilitado polo Concello para este proceso. O documento recolle os datos persoais e de contacto da persoa solicitante, a referencia catastral da parcela, os datos do polígono e da parcela e un apartado para describir a súa situación actual.

O impreso inclúe tamén un espazo específico para explicar a solicitude ou proposta que se desexa trasladar ao Concello, así como un apartado para indicar a documentación complementaria que se achega.

Entre os documentos que se poden acompañar figuran un plano do PXOM, un certificado urbanístico, un certificado catastral e unha fotocopia do DNI, segundo corresponda.

A documentación deberá presentarse presencialmente no Rexistro Municipal do Concello de Oroso ou por vía telemática a través da sede electrónica municipal, sendo obrigatorio e indispensable entregar o formulario de suxestión debidamente cuberto. Non se admitirá ningunha suxestión sen este documento.

O formulario está dispoñible para a súa descarga nesta mesma publicación:

DESCARGAR O FORMULARIO PARA PRESENTAR SUXESTIÓNS Á REVISIÓN DO PXOM (PDF)

Consulta PXOM orixinario e modificacións puntuais.

O Concello recomenda cubrir correctamente os datos identificativos e a información relativa á parcela para facilitar o estudo posterior de cada proposta.

Álex Doval anima a veciñanza a participar na planificación urbanística

O alcalde de Oroso, Álex Doval, destacou a importancia deste proceso para o futuro urbanístico do municipio e a oportunidade que ofrece ás persoas propietarias para trasladar as súas necesidades e propostas.

«Queremos que a veciñanza teña a oportunidade de trasladar as súas necesidades e propostas, porque coñecer a realidade de cada parcela e as circunstancias dos seus propietarios é fundamental á hora de abordar unha modificación do planeamento municipal», sinalou o rexedor.

Doval incidiu tamén en que «o urbanismo é unha cuestión fundamental para o desenvolvemento de Oroso, tanto para facilitar novas oportunidades como para dar resposta ás necesidades existentes nas nosas parroquias». Por este motivo, animou as persoas interesadas a participar e presentar as súas propostas dentro do prazo establecido.

A recollida destas achegas permitirá dispoñer de información directa sobre as circunstancias dos terreos e as demandas existentes, que poderán ser analizadas no marco dos traballos técnicos de revisión do planeamento.

Un paso na planificación do futuro de Oroso

O Plan Xeral de Ordenación Municipal é o instrumento que establece a ordenación urbanística do territorio e define o marco para o seu desenvolvemento. A súa revisión constitúe unha oportunidade para estudar a realidade actual do municipio e as necesidades futuras, tendo en conta tanto o núcleo urbano de Sigüeiro como as parroquias.

A participación das persoas propietarias nesta fase previa permite trasladar información concreta sobre as parcelas e formular propostas que contribúan a coñecer mellor a situación existente no territorio. Estas achegas serán estudadas e valoradas dentro do procedemento de revisión do planeamento municipal.

Desde o Concello lémbrase que a presentación dunha suxestión non implica a aceptación automática da modificación solicitada, xa que todas as propostas deberán ser analizadas conforme aos criterios técnicos e urbanísticos aplicables.

O Goberno municipal anima a veciñanza e ás persoas propietarias interesadas a aproveitar este período de tres meses para presentar as súas propostas e contribuír á planificación urbanística futura de Oroso.

Compartir: