Oroso despide a Victorino Verea Montero, memoria fotográfica de varias xeracións
O Concello de Oroso expresa o seu pesar polo falecemento do histórico fotógrafo ambulante, que estaba a poucos días de cumprir 99 anos e cuxo traballo permitiu conservar durante décadas unha parte esencial da memoria do municipio e da comarca
O Concello de Oroso quere expresar o seu máis profundo pesar polo falecemento de Victorino Verea Montero, histórico fotógrafo ambulante de Oroso, que faleceu aos 98 anos, a poucos días de cumprir os 99.
Durante décadas, Victorino Verea percorreu Oroso e os municipios da contorna coa súa cámara, deixando testemuño de boa parte da vida cotiá das súas xentes. As súas fotografías retrataron familias, celebracións, festas, encontros e momentos da vida diaria, converténdose co paso dos anos nun valioso documento gráfico para coñecer como era Oroso e como vivían as súas veciñas e veciños ao longo de varias xeracións.
O seu traballo transcendeu así a dimensión persoal da fotografía para converterse nun auténtico arquivo da memoria colectiva do municipio. Moitas desas imaxes, inicialmente concibidas para conservar o recordo de momentos familiares e especiais, adquiriron co tempo un importante valor histórico e documental.
Un legado incorporado ao Arquivo Histórico de Imaxes
Boa parte deste legado fotográfico foi incorporado ao Arquivo Histórico de Imaxes do Concello de Oroso, permitindo recuperar, catalogar e preservar un importante número de fotografías para as xeracións presentes e futuras.
Parte desta colección deu lugar tamén á exposición «Imaxes contra o esquecemento», unha mostra que permitiu á veciñanza reencontrarse con persoas, lugares, costumes e escenas de Oroso de décadas pasadas e comprender, a través da fotografía, a transformación experimentada polo municipio ao longo do tempo.
O traballo de Victorino constitúe, deste xeito, unha valiosa achega á conservación da memoria local. A través da súa cámara quedaron documentadas numerosas historias anónimas que, sen ese testemuño gráfico, correrían o risco de desaparecer co paso do tempo.
A súa figura queda ligada á historia de Oroso precisamente por esa capacidade para mirar, retratar e conservar momentos que hoxe forman parte da memoria de moitas familias.
Desde o Concello de Oroso queremos trasladar as nosas máis sinceras condolencias á súa familia, amizades e a todas as persoas que tiveron a oportunidade de coñecelo e compartir parte da súa vida con el.
Oroso despide así a un home que, cámara en man, contribuíu durante décadas a retratar o seu concello e as súas xentes.
Grazas, Victorino, por axudarnos a lembrar quen fomos e por deixar para o futuro tantas imaxes da historia de Oroso.
Descanse en paz.


