O alcalde de Oroso, Álex Doval, e a concelleira de Infancia, María Requejo, visitaron o Campamento Xuvenil de Pernocta 2026, unha das propostas incluídas na programación de actividades de verán do Concello de Oroso para a infancia e a mocidade. A visita permitiu coñecer de primeira man as actividades que están a realizar os participantes e compartir con eles unha parte desta experiencia.

O campamento está dirixido a rapaces e rapazas de entre 9 e 16 anos, ofrecéndolles a oportunidade de desfrutar durante varios días dunha experiencia de convivencia fóra do seu contorno habitual, acompañados por outros mozos e mozas da súa idade.

Ao longo da estancia, a programación combina actividades acuáticas e fluviais, xogos de aventura, escape room e diferentes propostas de ocio e entretemento, deseñadas para fomentar a participación, o compañeirismo e a autonomía dos participantes.

Máis alá do carácter lúdico das actividades, este tipo de iniciativas permiten á rapazada compartir experiencias, establecer novas amizades e desenvolver habilidades relacionadas coa convivencia e o traballo en equipo. A pernocta contribúe ademais a que os participantes vivan unha experiencia diferente, asumindo pequenas responsabilidades e gozando dun maior grao de autonomía nun ambiente seguro e supervisado.

Un verán con propostas para a infancia e a mocidade

O Campamento Xuvenil de Pernocta forma parte da ampla programación de actividades de verán impulsada polo Concello de Oroso. Este ano o municipio presentou unha oferta especialmente ampla, con 11 propostas diferentes e centos de prazas, promovidas tanto directamente polo Concello como en colaboración co tecido asociativo e deportivo local.

A programación abrangue actividades deportivas, educativas, culturais e de lecer, con alternativas adaptadas a diferentes idades e intereses. Entre as entidades participantes atópanse clubs e asociacións de diferentes ámbitos, como o Oroso Club Ciclista, a ED Xuventude de Oroso, o Club Hípico Amazonas e Cabaleiros, Oroso TM, Oroso Futsal, Hockey Oroso, Club Patín Oroso e Leones de Oroso Béisbol, ademais da Asociación AFECTO.

Neste contexto, o Campamento Xuvenil de Pernocta ofrece unha proposta especialmente orientada á mocidade de 9 a 16 anos, combinando aventura, natureza, deporte e convivencia.

Unha experiencia para pechar o verán

Na recta final das vacacións de verán, o campamento está permitindo aos participantes desfrutar dunha experiencia diferente antes do regreso ás aulas, aproveitando estes últimos días para compartir tempo cos seus iguais e participar en actividades ao aire libre e propostas de aventura.

Dende o Concello de Oroso destacamos a importancia de continuar ofrecendo alternativas de ocio educativo e saudable para a infancia e a mocidade, favorecendo ao mesmo tempo a convivencia, a participación e o aproveitamento do tempo libre durante o período estival.

O Concello quere agradecer tamén o traballo do persoal responsable da actividade, así como a confianza das familias que permiten que os seus fillos e fillas participen nesta experiencia.

Con iniciativas como este campamento, Oroso continúa apostando por unha programación de verán diversa e adaptada ás diferentes etapas da infancia e da adolescencia, ofrecendo á rapazada oportunidades para divertirse, aprender, convivir e crear novos recordos durante as vacacións.

O verán aínda non rematou e en Oroso a aventura continúa!