O Concello de Oroso e a Xunta de Galicia deron un novo paso na mellora dos espazos públicos do municipio coa sinatura do protocolo de colaboración que permitirá acometer a ampliación e modernización do parque canino de Porto Avieira, unha actuación que contará cun investimento de preto de 50.000 euros, financiado integramente polo Goberno galego.

O protocolo foi asinado pola conselleira de Medio Ambiente e Cambio Climático, Ángeles Vázquez, e polo alcalde de Oroso, Álex Doval, e establece que será a Xunta a encargada da licitación e execución das obras, mentres que o Concello porá os terreos necesarios a disposición da Administración autonómica e asumirá posteriormente o mantemento e conservación das instalacións.

A actuación permitirá ampliar a superficie do parque, que pasará dos actuais 950 metros cadrados a arredor de 1.100 metros cadrados, converténdose nun espazo máis amplo, moderno e funcional para as persoas propietarias de mascotas e para os propios animais.

Entre as melloras previstas inclúense a renovación do peche perimetral e doutros elementos de seguridade, a instalación de fontes adaptadas para cans, papeleiras específicas, dispensadores de bolsas hixiénicas, unha nova área de xogos con obstáculos e ramplas para favorecer o exercicio e a socialización dos animais, así como bancos, nova vexetación e árbores que proporcionarán zonas de sombra para as persoas usuarias.

Durante o acto de sinatura, a conselleira destacou que este proxecto forma parte da segunda fase da iniciativa impulsada pola Xunta para promover parques caninos en Galicia, unha vez desenvolvidos os primeiros proxectos nas grandes cidades. Neste novo programa incorpóranse tamén concellos de menor tamaño comprometidos co benestar animal, como é o caso de Oroso. Segundo lembrou, no municipio hai actualmente 2.888 cans inscritos no Rexistro Galego de Identificación de Animais de Compañía (REGIAC), o que supón aproximadamente 1,4 cans por cada cinco habitantes, un dato que evidencia a crecente demanda deste tipo de equipamentos.

Pola súa banda, o alcalde de Oroso, Álex Doval, destacou que esta actuación responde ao compromiso do goberno municipal por continuar mellorando Porto Avieira e dotando o municipio de servizos públicos de maior calidade. Nas súas redes sociais, o rexedor sinalou que esta nova infraestrutura permitirá ofrecer un espazo máis seguro, cómodo e adaptado ás necesidades das mascotas e das súas familias, ao tempo que agradeceu á Xunta de Galicia a súa colaboración para facer posible este investimento.

Esta actuación enmárcase na aposta do Concello por seguir creando espazos públicos máis accesibles, sostibles e pensados para mellorar a calidade de vida da veciñanza, reforzando ao mesmo tempo o compromiso co benestar animal e coa convivencia responsable.

Coa ampliación do parque canino de Porto Avieira, Oroso continúa avanzando na modernización dos seus equipamentos municipais e na creación de novos espazos de lecer adaptados ás necesidades dunha sociedade cada vez máis sensibilizada co coidado e protección dos animais de compañía.