O campo municipal Lino Balado converteuse este venres no epicentro do fútbol base coa celebración do Torneo Oroso Fútbol 8, unha cita xa consolidada no calendario deportivo local que reuniu a preto de 500 nenos e nenas nunha xornada marcada pola ilusión, a convivencia e o espírito deportivo.

Organizado coa colaboración da ED Xuventude de Oroso, o torneo contou coa participación de numerosos clubs, familias e persoas colaboradoras, que contribuíron a crear un ambiente excepcional nas instalacións municipais, convertendo o evento nunha auténtica festa do deporte base.

Ao longo da xornada disputáronse encontros en diferentes categorías, destacando o alto nivel deportivo e, sobre todo, os valores que transmite o fútbol formativo: compañeirismo, respecto e esforzo.

Resultados destacados

Categoría Alevín

• RC Celta
• ED Xuventude de Oroso

Categoría Biberón

• Victoria CF
• ED Xuventude de Oroso

Máis alá dos resultados, o torneo destacou pola gran participación e pola implicación das familias, que acompañaron aos máis pequenos nun día inesquecible, reforzando o papel do deporte como ferramenta educativa e de integración social.

Desde o Concello de Oroso quérese poñer en valor o traballo da ED Xuventude de Oroso na promoción do fútbol base e na formación de novos deportistas, así como agradecer a colaboración de todas as entidades e persoas que fixeron posible o desenvolvemento desta xornada.

Parabéns a todos os equipos participantes polo seu esforzo, deportividade e ilusión nun evento que reafirma o compromiso de Oroso co deporte base e cos valores que representa.