O Concello de Oroso celebrou na mañá deste domingo a XII Carreira Pedestre Concello de Oroso, unha edición que volveu converter as rúas de Sigüeiro nun espazo de encontro para o deporte, a convivencia e os hábitos de vida saudables, cunha destacada participación de atletas e público.

A proba, con saída e meta na rúa Camiño Inglés, contou con percorridos de 5 e 10 quilómetros, así como coas correspondentes categorías escolares, permitindo a participación de deportistas de todas as idades e niveis. Esta carreira está organizada polo Concello en colaboración coa Federación Galega de Atletismo e o Club Atletismo Tambre, consolidándose como unha das citas de referencia do calendario atlético galego.

Un dos grandes fitos desta edición foi a súa inclusión, por primeira vez, no Campionato Xunta de Galicia, nas categorías absoluto, Sub18, Sub20, Sub23 e Máster, un recoñecemento ao traballo organizativo desenvolvido ao longo dos anos e ao crecemento continuo desta proba.

A xornada desenvolveuse nun ambiente deportivo e familiar, no que se combinaron a competición de alto nivel coa participación popular, reforzando o carácter integrador e aberto da carreira. A presenza de atletas federados e de nivel autonómico elevou o nivel competitivo da proba, contribuíndo tamén á proxección deportiva do municipio.

Desde o Concello de Oroso quérese destacar e agradecer a implicación de todas as persoas e colectivos que fixeron posible o desenvolvemento do evento, entre eles a Policía Local, a Agrupación de Voluntarios de Protección Civil de Oroso, o voluntariado, o Club Atletismo Tambre, o persoal do Polideportivo e o equipo técnico de Deportes, cuxo traballo foi fundamental para garantir a seguridade e o bo funcionamento da xornada.

Así mesmo, o Concello felicita a todas as persoas participantes, tanto nas probas absolutas como nas categorías base, polo seu esforzo e deportividade, contribuíndo ao éxito dunha cita que segue medrando ano tras ano.

A Carreira Pedestre de Oroso reafírmase así como unha proba consolidada e en constante evolución, que combina deporte, participación cidadá e promoción de hábitos saudables, situando ao municipio como un referente na organización de eventos deportivos en Galicia.

Desde o Concello de Oroso continuaremos impulsando iniciativas que fomenten a actividade física, a convivencia e o benestar da veciñanza.



Os resultados completos poden consultarse na web oficial de Carreiras Galegas.