O Concello de Oroso informa de que desde o 17 de marzo ata o 7 de abril permanecerá aberto o prazo para solicitar praza nas escolas infantís municipais de cara ao vindeiro curso escolar. Trátase dun servizo fundamental para apoiar ás familias do municipio e garantir unha atención educativa, segura e de calidade para nenos e nenas nos seus primeiros anos de vida.

As escolas infantís de Oroso constitúen un recurso clave de conciliación familiar e laboral, ofrecendo un espazo adaptado ás necesidades da primeira infancia no que se promove o desenvolvemento educativo, emocional e social dos máis pequenos e pequenas a través dun proxecto pedagóxico específico para estas idades.

O proceso de admisión contempla tamén un prazo especial para bebés que nazan con posterioridade ao 7 de abril, de modo que as familias que se atopen nesta situación poderán presentar a súa solicitude ata o 5 de maio.

Calendario do proceso de admisión

O calendario establecido para o proceso de matrícula é o seguinte:

• Presentación de solicitudes: do 17 de marzo ao 7 de abril
• Prazo especial para bebés: ata o 5 de maio
• Publicación das listaxes provisionais: 6 de maio
• Prazo de reclamacións: do 7 ao 13 de maio
• Publicación das listaxes definitivas: 29 de maio
• Formalización da matrícula: do 1 ao 12 de xuño

Presentación de solicitudes

As solicitudes deberán presentarse preferentemente a través da sede electrónica do Concello de Oroso. Tamén poderán entregarse presencialmente no Rexistro Xeral do Concello, en horario de 9:00 a 13:30 horas.

Máis información

As familias interesadas poden obter máis información ou resolver dúbidas a través da páxina web do concello.


Desde o Concello de Oroso anímase ás familias a participar neste proceso e a aproveitar un servizo educativo pensado para acompañar o crecemento e o desenvolvemento dos máis pequenos nun entorno próximo, profesional e de confianza.