O deporte de Oroso suma un novo éxito grazas ao resultado acadado por Álvaro Rodríguez, veciño de Sigüeiro, que conseguiu a medalla de bronce no Campionato Xunta de Galicia Sub-14 de Pista Curta, unha das principais competicións autonómicas do atletismo base.

Este podio supón un novo recoñecemento ao traballo e á progresión do atleta orosino, que continúa demostrando o seu talento nas probas de pista e consolidándose entre os deportistas máis destacados da súa categoría en Galicia.

Os campionatos autonómicos de pista curta reúnen a atletas procedentes de diferentes clubs galegos, converténdose nun escenario esixente no que mozos e mozas deportistas teñen a oportunidade de medir o seu nivel competitivo e continuar avanzando na súa formación deportiva.

Desde o Concello de Oroso queremos trasladarlle a Álvaro Rodríguez os nosos máis sinceros parabéns, así como recoñecer o esforzo, a constancia e o traballo diario que hai detrás deste logro, no que tamén teñen un papel fundamental os adestradores, o club e a familia.

O Concello reafirma así o seu compromiso co apoio ao deporte base, celebrando os éxitos das novas xeracións de deportistas que levan o nome de Oroso ás diferentes competicións deportivas.

Parabéns, Álvaro, e moitos éxitos máis no futuro.