O deporte de Oroso volve estar de celebración grazas aos éxitos acadados por Sasha Malov, veciño de Porto Avieira, que nas últimas dúas semanas logrou tres títulos internacionais en probas do circuíto mundial U15, celebradas en diferentes cidades de Sudamérica.

O deportista orosino proclamouse campión na categoría individual U15 en Bos Aires, nun torneo que reuniu a novos talentos procedentes de distintos países e que forma parte do calendario internacional desta disciplina.

Tras este primeiro triunfo, Sasha continuou a súa participación no circuíto cunha nova competición celebrada en Asunción (Paraguai), onde volveu demostrar o seu gran momento de forma. Na capital paraguaia conseguiu dous novos títulos, proclamándose campión en dobres mixtos e acadando tamén o ouro na categoría individual U15, completando así un destacado triplete de vitorias internacionais.

Estes resultados confirman a progresión deportiva de Sasha Malov e o seu posicionamento entre as promesas máis destacadas da súa categoría a nivel internacional, levando ademais o nome de Oroso a competir e destacar en escenarios deportivos de primeiro nivel.

Desde o Concello de Oroso queremos trasladarlle os nosos máis sinceros parabéns a Sasha Malov, así como á súa familia, adestradores e persoas que forman parte do seu entorno deportivo, polo traballo e dedicación que hai detrás destes importantes logros.

O Concello reafirma o seu apoio ao deporte base e celebra os éxitos das e dos deportistas do municipio que, coa súa dedicación e talento, contribúen a levar o nome de Oroso máis alá das nosas fronteiras.

Parabéns polos éxitos e moitos máis logros no futuro.