O Concello de Oroso participou este sábado na I Carreira e Andaina Solidaria GatoCan Oroso, unha iniciativa deportiva e solidaria que reuniu a numerosos veciños e veciñas nunha xornada marcada pola participación, a convivencia e o compromiso co benestar animal.

A actividade, organizada pola Asociación GatoCan Oroso en colaboración co Concello, celebrouse no Polígono de Sigüeiro, con saída e chegada nas instalacións da propia entidade, na Rúa Trazo. O evento contou cun percorrido circular de aproximadamente 5 quilómetros, tanto na modalidade de carreira como na andaina, permitindo a participación de persoas de todas as idades e condición física.

O obxectivo principal desta primeira edición foi recadar fondos destinados ao coidado, mantemento e atención veterinaria dos animais recollidos pola asociación, así como das colonias felinas existentes no municipio. Ademais do seu carácter solidario, a iniciativa serviu tamén para dar visibilidade ao labor diario que GatoCan Oroso desenvolve na protección animal e na promoción da adopción responsable.

A elevada participación rexistrada puxo de manifesto a implicación da veciñanza de Oroso con este tipo de propostas solidarias, que combinan hábitos de vida saudables coa colaboración social. Durante a xornada viviuse un ambiente familiar e participativo, no que moitas persoas realizaron o percorrido acompañadas dos seus cans ou incluso de animais da propia asociación.

Dende o Concello de Oroso quérese destacar e agradecer o traballo do voluntariado de GatoCan Oroso, fundamental para garantir o coidado e protección dos animais abandonados, así como a implicación de todas as persoas participantes, colaboradores e entidades que fixeron posible o éxito desta primeira edición.

O Goberno municipal reafirma así o seu apoio ás iniciativas que fomentan a solidariedade, a participación cidadá e o respecto polos animais, contribuíndo a construír un municipio máis comprometido, responsable e cohesionado socialmente.