O Pleno do Concello de Oroso aprobou na sesión celebrada este xoves a aprobación inicial da ordenanza municipal para a protección e conservación dos camiños e vías de titularidade municipal en relación coas operacións de corta e saca de madeira.

Esta nova normativa nace coa finalidade de garantir o bo estado das infraestruturas viarias municipais, compatibilizando a actividade forestal, de grande importancia no municipio, co dereito da veciñanza a contar con camiños e vías públicas seguras e en condicións axeitadas de uso.

A ordenanza establece a obriga de comunicar previamente as operacións de corta e saca de madeira, así como unha serie de condicións técnicas, medidas de control, obrigas de limpeza, reparación de danos e un réxime sancionador para os casos de incumprimento. O seu obxectivo é evitar os deterioros que estas actividades poden provocar nos camiños municipais e reforzar a responsabilidade das empresas madeireiras e das persoas propietarias dos terreos.

Coa aprobación inicial deste texto, ábrese agora un período de exposición pública de 30 días hábiles, durante o cal as persoas interesadas poderán consultar o expediente e presentar as alegacións que consideren oportunas. De non presentarse reclamacións, a ordenanza quedará aprobada de maneira definitiva.

Desde o Concello de Oroso destácase que esta medida supón un paso importante para mellorar a protección das infraestruturas municipais, reforzar a seguridade viaria e garantir unha convivencia equilibrada entre a actividade forestal e o interese xeral da veciñanza.