Na xornada de onte Álex Doval, alcalde de Oroso e presidente da Asociación de Concellos da Vía Verde Compostela-Tambre-Lengüelle, participou como representante da Vía Verde na European Greenways Conference, celebrada en Bilbao baixo o patrocinio da European Greenways Association (EGWA) co foco no turismo industrial sostible, patrimonio ferroviario e mobilidade activa.

Durante o encontro puxéronse en valor a importancia de preservar o patrimonio industrial e ferroviario non só pola súa dimensión histórica senón tamén como motor de desenvolvemento turístico sostible, ademais de debatirse estratexias de mobilidade activa e planificación de infraestruturas que favorezan sendas e vías verdes como opción sostible para desprazamentos, lecer e turismo responsable.

Na conferencia presentáronse boas prácticas e modelos de xestión inspiradores procedentes de diferentes Vías Verdes europeas para fomentar a replicación de iniciativas exitosas, o intercambio de experiencias entre territorios e a cooperación transnacional en materia de conservación, uso público seguro e integración paisaxística.

A cita tamén serviu para destacar como proxectos como o da Vía Verde Compostela-Tambre-Lengüelle poden contribuír á cohesión territorial, á dinamización económica local e á promoción dun turismo de proximidade, apoiado polos fondos europeos, pola colaboración institucional e pola implicación das comunidades locales.

Álex Doval aproveitou para trasladar o compromiso de Oroso e dos demais concellos implicados con seguir avanzando nas obras e melloras necesarias, así como para consolidar a Vía Verde Compostela-Tambre-Lengüelle como un referente galego de mobilidade sostible, patrimonio ferroviario recuperado e oferta de lecer en natureza.