O municipio irmandado de Góis, inaugurou este 11 de xullo a edición 2025 da mostra internacional "Góis Oroso Arte", titulado “Interior inspira cultura: arte pola inclusión e a igualdade”. A cerimonia celebrouse na Casa da Cultura, coa benvida oficial aos artistas e a apertura da exposición colectiva nas Galerías da Casa do Artista na que estiveron presente as autoridades de Góis e Oroso, encabezadas polo alcalde, Alex Doval, e a concelleira de Cultura, María Requejo.

Organizada polos municipios de Góis (Portugal) e Oroso (Galicia, España), a mostra esténdese do 11 ao 31 de xullo e reúne creacións en pintura, fotografía, escultura, instalación e poesía por artistas nacionais e internacionais, con máis de 43 obras confirmadas.

Esta edición, co lema "Interior inspira cultura", busca destacar o potencial transformador do interior de Portugal e Galicia, ao tempo que fomenta a inclusión e a igualdade social.

Ademais, durante esta última semana, unha delegación de mozos e mozas de Oroso participou nun intercambio cultural en Góis. Incluíuse a segunda residencia artística dirixida á xuventude (10 participantes, 7–13 de xullo) baixo áreas temáticas de inclusión e igualdade, reforzando os vínculos entre ambos municipios.

Actividades destacadas de Góis Oroso Arte 2025

• Exposición colectiva: Obras diversas distribuídas entre as Galerías da Casa do Artista e a Casa da Cultura.
• Arte ao vivo: intervencións en diferentes freguesías, con propostas para reutilizar portas, xanelas e outros obxectos, integrándoos no patrimonio artístico comunitario
• Residencia Xuvenil Internacional: 10 artistas novos de Oroso e máis tarde de Góis, con programas sobre arte, inclusión e igualdade.
• Concertos: o 12 e 13 de xullo, con propostas musicais como “Paz e Esperanza” e artistas como Gisela João

Unha aposta pola cultura como ponte transfronteiriza

Desde o ano 2006, Góis e Oroso renovan cada verán o seu compromiso con iniciativas culturais que reforzan valores de convivencia, respecto e creatividade. "Góis Oroso Arte 2025" non só expón un conxunto de obras senón que impulsa un diálogo artístico entre territorios, colectividades e idades, promovendo unha cultura accesible e transformadora.