O Conselleiro de Educación, Román Rodríguez González, acompañado pola delegada territorial da Xunta na Coruña, Belén Do Campo Piñeiro, e o Alcalde de Oroso, Alex Doval, visitaron hoxe o CEIP Plurilingüe de Sigüeiro para presentar o proxecto de renovación da cuberta do centro, unha actuación que contará cun investimento de máis de 310.000€ e que forma parte da reforma integral que comeza neste colexio.

Esta intervención ten como obxectivo mellorar o confort térmico e a eficiencia enerxética do colexio, beneficiando o día a día de toda a comunidade educativa. Aliñase cos principios de creación de espazos máis verdes e sostibles para o alumnado.

A obra consistirá na instalación dunha cuberta de panel sándwich de 30 mm de espesor na edificación principal e no anexo posterior. Ademais, substituiranse os paneis de policarbonato actuais por placas de policarbonato celular, e instalaranse novas baixantes e unha canle de recollida de augas pluviais en aceiro galvanizado. O inicio da obra está previsto para o segundo trimestre do próximo ano.

Nos últimos anos, a Xunta xa ten investido máis de 5 millóns de euros nos centros educativos de Oroso, entre eles o CEIP Plurilingüe do Camiño Inglés e o IES de Oroso, mellorando os espazos de aprendizaxe para todos os nenos e nenas do concello.